مهرج وشاعر وصاحب مزاج - ناجي نعيم
كده الجو أجمل
كده الدنيا حاله
كده الهم دلوقتي ياخد إحاله إلى حد غيري
ودلوقتي همضي بإيدي إستقاله
لحضرة ضميري
يا طياره سيري
ويادماغي طيري
ويادنيا دايما تعاملني ميري
ويا حظ إيه !
تخيل يا بيه
من الإندماج
معنتش بحس بوجود إحتياج
بقيت غصب عني
كتير الأسامي
مُهرِّج وشاعر وصاحب مزاج
..
مُهرّج
وشاعر
وصاحب مزاج
ومجنون شويه وعندي إزدواج
بفكر ..
لو اني بفكر دي كارثه
بعيش بالممارسه
وبالإندماج
مُهرّج وشاعر وصاحب مزاج
بحب الحياه
فقير ..
بس عايش غني مش معاه
خبير معاناه
وتاجر مشاعر
بقيت غصب عني
يادي النيله شاعر
بلم في حالاتي
وبشكر ..
جميع النساء اللواتي
شافوني حلاتي
صحيح عشت جن
بنام مطمئن
وبتعشى فن
واقوله بمزاج
ورافض تماما مصير الزواج
محبش حكومه
وقلبي عزومه لبنت الحلال
محبش جدال
ولا قيل وقال
وبطلت أجالس جميع العيال
ومش منطوي
صحيح شاري قلبي الجديد فوضوي
وعامل دماغي
وفاهم أوي
ومن صغري كنت أعشق المدرسه
فجالي النصيب قام مجاش هندسه
فقررت أهندس حياتي بمزاجي
وحطيت أساس
مبشغلش بالي ولا بأي ناس
أنا لوحدي ناس
بقيت حد عريان بغطي احتياجي
وبرجو التماس
بقيت إزدواجي
بقيت حد تاني
وبرضو اسمه ناجي
واخدني إقتباس
مُهرّج .. وشاعر .. وصاحب مزاج !
ليست هناك تعليقات