تجلي - شروق نبيل
و ماقدرتــِش أكون " نوحي "
عشان أعرف في يوم أجعل
ضلوعي سفينة تؤويكي
و لا قدرتش أوديكي لسفينة " نوح "
أنا كُل اللي كان في إديــّا
إني آخدك لأبعد تلّ و أرميكي
كأنك ذنب
و أدوب في المولوية طوفان
بيقتلني سؤال " إزاي "
إذا تنوحي ..
نواحــِك ناي
بيطرَح فوق كتافي جناح
و يجعل قلبي دُف و زار
أدوب في دواير الحَضرة
و أقول عَـنّي أكيد هتتوب
ألاقي كفوفك الفضّة
بتتشبّث بطرف التوب
يقين فضّاح
أنا اللي مُستباح ذبحُه
إذا تبكي
ألا باللهِ فــَ أرتفقي
أو إنتظري لحد ما يكمل المَشهد
بقيت درويش
عشان ماعييش ضلوع تكفـِـي
بنايـة البيت
و بتسوّل عنيكي السود
فــَ ماتحنّيش
قلـَعتـِك " موت "
و عرّيت للوشوش بعدك " بياض كفني "
أنا قررت أبان ليكي خلاص عـَـاري
ياريت ما يخــُضّكيش عْـاري
ياريت في الرقصة دي بالذات
تواري عنّي كُل عتاب
تواري فيكي سوء الظّن
ياريت لو تفتحيلي الباب
و ترمي عنيكي جوايا
وترمي من إيديكي الطـَلق
ماعدش فــِ قلبي تنهيدَة
ولا حتي براح للطلق
يعيش درويش ولو قاتلينُه كُل الخـَلق
تعيش الغنوة جوّة الحَــلق
ولو تنسي اللي كاتبها
ليست هناك تعليقات