24 شارع الحجاز .. هشام الجخ
ادلعي واتبغددي واتفاخري واتباهي
قولي لكل الناس دا عاشقني والله
لمي العيال حواليا زفوني.. ظاظوا عليا وحدفوني طوب
مانا اللي سبت عنيكي لفوني وانا اللي استاهل كل يوم مركوب
فادلعي واتبغددي واتفاخري واتباهي
آدي ضحية كمان فدا رمشك الساهي
موت الضحايا جزاياي مانا اللي وديتك
ولحد حد موديتوش ولا حد وديتك
وقلعت كل سنيني على خصرك
ضفرت شعرك عش جوايا
بايعت حكمك وابتديت عصرك
ووقفت ورا عرشك ومسكت هواية
موت الضحايا جزايا وكلها ضحايا
مين اللي قال الحب آخره عمار؟
الحب آخره نهاية في رحايا
القسوة طاحنة والحجر دوار
فادلعي واتبغددي واتفاخري واتباهي
واستنكري من عزتي واستهتري بجاهي
خليني مضرب مثل من بعد هيبة ووزن
كبي المرار في العسل واملي الفرح بالحزن
يعني انتي أولهم ولا انتي أول هَمّ
ولا أنتي أول سهم اتسملي واتسمّ
لو تكشفي ضهري تلقي السهام علامات
وانا زي زرع في هوا وطا حيو علا مات
موت العلالي شرف بس اسمها موتة
مش عدل تبقي في ترف وانا بطفح الكوتة
ما يا إما نقسمهم وخزة قصاد وخزة
يا إما لا مواخزة توتة يا حدوتة
وابقي اكدبي براحتك وادلعي براحتك
طعم الهزيمة جزا للي يزور ساحتك
وانا قلبي ياما غلب مش عيب يبات مغلوب
أهو برضه فدّتينا.. كفرنا بيكي ذنوب
ولحسنا من شهدك وشربنا من ريقك
وسكرنا من كاسك وكسرنا إبريقك
وطعمنا من حسنك وشبعنا ببريقك
ومشينا في طريقك ورجعنا ملو اليد
جرحي قصاد جرحك ولا حد ظالم حد
ولا إنتي فاكرنا رجالة خيبانة
نبكي على النسوان ونسحّ في بكانا
كنتي اسألي (نانا) اللي اسمها (نانا)
يا دوب زعلنا يومين واهي دنيا لاهيانا
هبكي عليكي انتي؟
ماتكدبيشس عالناس الناس دي عارفاني
قلبي خشب لو غطس بيقب من تاني
فمتحرجيش روحك وتقولي ده عاشقني
بدل ما صاحباتك يقولولك آدي دقني
حبي على قدك واحكي على قدك
وان جت سيرتنا فيوم ابتلزمي حدك
تدلعي ماشي.. تتبغددي ماشي
وتقولي حبني موت برضه ميجراشي
بس انتي من جوة فاهمة إن زمنك مات
وبقيتي زي أميرة قلبها شحات
لفي على صحابك.. سبيني في غيابي
قولي إن عمرك يوم ما وقفتي على بابي
لا كويتي قمصاني ولا جيتي زرتيني
ولا تعرفي مكاني ولا تعرفي تجيني
وإني يا دوب واحد دايب في دباديبك
عامل كما عيل شابط في جلاليبك
وانتي يا عيني (أوف) زهقانة مني خلاص
عملتي زار بالدف.. وسقتي كل الناس
وانا برضه لازقلك معلش حظك كدة
ربك ورازقلك
روحي يا شاطرة هناك انضمي للألبوم
أنا كل عشرتي بيكي اتنين وعشرين يوم
عملتي نفسك حكاية ومحبة فياضة ومخدة بكاية
وسهر وسهد وويل وبكى وغنى ومواويل في اتنين وعشرين ليل
على أي حال شكرا.. وشكرا.. ثم شكرا للقصيدة
قلما تأيني يا امرأة بأفكار جديدة
ليست هناك تعليقات