يا مصر هانت .. تميم البرغوثي
يامصر هانت وبانت كلها كام يوم
نهارنا نادي ونهار الندل مش باين
الدولة مفضلش منها إلا حبة شوم
لو مش مصدق تعالي علي الميدان عاين
ياناس مفيش حاكم إلا من خيال محكوم
واللي هيقعد في بيته بعدها خاين
اللي هيعقد كأنه سلم التانيين
للأمن وقاله هما ساكنين فين
وصلت لضرب الرصاص عالخلق في الميادين
حتى الجثث حجزوها اكمنهم خايفين
يا مصر أصبحنا أحياء وميتين مساجين
فاللي هيقعد في بيته يبقى مش مفهوم
واللي هينزل الهي حارسه صاين
يامصر هانت وبانت كلها كام يوم
نهارنا نادي ونهار الندل مش باين
نهارنا نادي وبإيدينا علي فكرة
الصبح عنده فضول راح نعمل إيه بكرة
إيده على الباب وخايف يلمس الأكرة
ادخل يا أستاذ براحتك والبلد حرة
إحنا زهقنا نشوف الصبح من برة
ادخل وخرج بقايا العتمة من برة
الناس ديه حرة وجنود الأمن مضطرة
ياصبح طلعت روحنا لجل تيجي يا خيّ
طالعين نجيبها أهو في كل حارة وحيّ
حتى لو ضربونا بالرصاص الحي
شوف الميادين كدة مفروشة خلق وضي
دايما مفاجأة ودايما وقتها معلوم
الحكم لينا وليكي الحق يا مداين
يامصر هانت وبانت كلها كام يوم
نهارنا نادي ونهار الندل مش باين
ياصف عسكر بدال الدرع شيلوا اتنين
خمسة وعشرين يناير ياشباب فاكرين
كان فيه انجليز ووزير الداخلية تخين
كان عنده برده عساكر زيكم جامدين
سابهم يموتوا علاولة لو سأل فيهم
كانوا شبهكم أساميكم أساميهم
ياعسكري البهوات اللي بتحميهم
ممكن يردوا عليك لما تناديهم؟
ياعسكري أنا أصلي بس بستغرب
لو لاقي تأكل وتشرب قوم ياعم اضرب
اضرب عشان الوزير من ضربتك يطرب
لكن هتشتغل إيه لما الوزير يهرب
أما الشديد القوي القادر أبو القادر
برميل تلامة نشع على مصر مِ الآخر
لو شافته معددة تكتب أدب ساخر
ثابت يقول للهرم يا كابتن اتّاخر
ولم يزل معتقد إن الهرم هيقوم
ادي الحجر والبشر قايمين يا سيد القوم
والدين هيترد ياللي عشت متداين
يامصر هانت وبانت كلها كام يوم
نهارنا نادي ونهار الندل مش باين
ده حكم أسرة ولا خوفو ولا خفرع
ولا وجع بطن يتعالج بزيت خروع
عمل مسوكر بعيد عنك ولا يطلع
جربنا فيه كل شىء ملقينا شيء ينفع
منفعش بالأدوية جربنا ألف طبيب
ولا بعطارة شيوخ ليهم بلح وزبيب
ولا بجحفل مغولى وضرب بالقباقيب
عمل مسوكر وسفلي شغل تل أبيب
وشغل أمريكا متغلف وختمه عليه
ضيف زارنا يا عم من غير دعوة لابس بيه
قاعد تلاتين سنة ومبيقولش قاعد ليه
والنية يديها لابنه النابغة من بعديه
ويقول قضا وقدر بين البشر محتوم
قولناله طيب ومين قال إن القدر معلوم
ويش عرَّفك يا فخامتك بالذي كاين
يامصر هانت وبانت كلها كام يوم
نهارنا نادي ونهار الندل مش باين
ليست هناك تعليقات