إلى مسجون.. محمد عبد القادر
في يوم من الأيام دارت فِ بالي هموم
أسراب من الغربان قدام عيوني تحوم
بتقولّي يا إنسان إنتا عليك اللوم
بتخاف من السجان وبتقضي كل اليوم
تحلم بيوم إفراج، إمتى هيجي اليوم؟
*******
إمتى هيجي يوم تهرب من القضبان؟
وتلاقي نفسك فيه بتحاكم السجان
اللي زرع جواك الظلم والحرمان
إمتى هيجي اليوم ترجع تكون إنسان
********
إمتى هيجي اليوم وتلاقي باب مفتوح؟
وتلاقي منُّه النور قدَّام عِنيك بيلوح
وتلاقي برَّة الباب ريحة عطور بتفوح
ريحة هوا الأوطان اللي ترد الروح
*******
يا صاحبي يا إنسان الباب ده ملك إيديك
قوم حارب السجان ولبرة مد عينيك
خليها مرة تشوف اللي يدور حواليك
يمكن تشوف إنسان يقدر يشد إيديك
ويخرَّجك مِ الباب اللي اتفتح بعينيك
********
يا صاحبي يا إنسان ليه مش بتحلم؟ ليه؟
إحلم ده حتى الحلم بتلاقي نفسك فيه
والحلم هوة الزاد اللي انتا عايش بيه
يمكن هيجي الوقت واللي انتا تحلم بيه
يصبح حقيقة ف يوم وتلاقي نفسك فيه
ليست هناك تعليقات