عشان ابقى شاعر - ضياء غنيم
اخيرا هوافق
هطبل وانافق
هـ صاحب عيونك واخونك وارافق
عشان ابقي شاعر ويوصل كلامي
عشان ابقي مبدع وكاتب وبارع
عشان اما ادندن ترد الشوارع
عشان ابقي شاعر ويوصل كلامي
لا هوصف دموع الغلابة ف قصايد
ولا انشر فسادكم وأعبي الجرايد
هلحن وادندن ف عشق البيادة
هـ رد التحية وأقدم سلامى
عشان ابقي شاعر ويوصل كلامى
هسيب المواجع ف درب السكات
هركّب قصايد ف عشق البنات
لا هوصف جراحكم ولا اكتب اهات
عشان تسمعوني
عشان ابقي عاقل واصدق جنوني
عرفت انه لازم ب ظلمك تخوني
فهظلم قصايد بتخلق بدايل
هقول ان مصر البهية العفية الصبية بجدايل
هكون اللى شايف وساكت وقايل
بانك حبيبتى
هقول انى عاشق وعشقك مصيبتى
عشقتك تخوني واخونك عِشقتي
هوصي القصايد تبطل تلومك
هـ جمل همومك واقولِك عَشيقتي
هقولِك عشقتك واشوفك قبالى
ف خوفك ف صمتك ف قسوة خيالى
ف رقة ترابي
عشقتك ف ذلّك فغربة صحابي
ف ليلك وشمسك وشيبة شبابى
ميدانك بيهتف اجيلك أحابي
عشقتك ف ظلمك يا بنت ال.......
عشقتك ف نارك
عشقتك ف همك ودمك وعارك
ف ضمك ولمك وعتمة حصارك
عشقتك أغانى
تهد الاماني
بتوصف ممات الحقيقة ف كيانى
أمانه اسمعيلى ولو كلمتين
بسافر وبرجع وبشبع حنين
هتمتم وهختم جميع القصايد
بضحكة شفايف وشوق السنين
عشان ابقي شاعر
هدوّن ف فضلك معاني الفراق
هجمع قصايد ويبقي اتفاق
اصهين واسايس واطنش دقايق
هسيب الحقايق واقولك نفاق
عشان ابقي عاجب
عشان ابقي عينك ورمشك وحاجب
عشان ابقي حاجب شموس المشاعر
عشان ابقي شاعر
عشان اما اسلم تردي السلام
عشان ابقي مُلهِم وانول احترام
عشان اللى بدل حقايق وزيف
مخلد وعايش ف بحر الكلام
عشان الحقايق بتوجع تمللى
لقيت الضماير ف شرعك حرام
حرام إنى أكمل ف عدّك كمالة
حرام أما تشرخ ف زوري القوالة
وتفضل ودانك ف طينها وعجين
هنكتب لمين
ومين اللى مالك ذمام السعادة
ومين اللى راقد ف طينك حزين
ومين اللى كمل وعارف وسلم
ومين اللى شايف طريقك مضلم
ومين اللى سامع
ومين راح يسمع رصيف الشوارع
ومين اللى بارع
ف هتك المشاعر
وفض البكارة ف عيون الحياة
ومين اللى راسم طريقه ف اديكي
وضَلّت نهايته وضَلك وتاه
ومين اللى وقت المواجع بيفرح
تعالى اما نحسب ونجمع ونطرح
ويمكن بخرف وأحدف بلايا
ويمكن بظلمك ظلمتك معايا
اخيرا هقدّم قرار النهاية
هخون القصايد واغش الاسامي
عشان ابقي شاعر ويوصل كلامي
ليست هناك تعليقات